Wiva el smartfon!
Fameja Alpina > Toni e Bepi
Toni e Bepi
di Isidoro Perin
Wiva el smartfon!
- Ciao Bepi. Bevetu nu’onbra?
- Spèta che son drìo ciattar.
- Cossa fatu col teéfonin de to’ fiol?
- Ciò! Questo l’è méo, l’ò conprà mi, e adess son drìo inparar a dopararlo.
- Senti Bepi, àssa perder che si no ’l proseco se svanpisse.
- Toni, varda che no se pol pì restar indrìo, al dì de uncuò bisogna esser senpre connessi se te vol saver ’e novità.
- Ma varda che chi che scrive ’i dise sol che quel che ghe interessa farte saver. Pitost sta atento ti a quel che te scrive, parché ghe n’è zente che ghe vol saver i to afari par farse i soi.
- Ma no, noaltri se se parla in vordstapp, cussì non se paga. Varda che l’è bel, te conosse zente nova, te fa amicissie…
- Capisse che te si restà ti sol, ma ’e amicissie l’è meio che te ’e fae coi alpini o qua al bar in piassa dove che i amissi tei vardi sui òci.
- Varda, varda qua! Questo l’è me amigo da Pontebba che ’l me manda ’na fotografia del tenporal che ghe n’é dess lassù.
- E ti adess cossa fatu? Vatu casa ciorte ’a onbrèa, che qua ghe n’è ’l sol fora?
- …Ostrega ò sbaglià. Pèta che pense come che se fa: (bisogna che frache qua, dopo che vae su, che trova ’a icona, eco…) Te me fa far confusion!
- No te vorà mia dirme che te passa a zornada a zogar co sta batarìa?
- No, ma tante volte passe ’l temp. Vardar ’a teévision me stufe… No te sa che ’a me vissina de casa tute ’e matine ’a me manda ’na fotografia dei so fiori con un pensierin de bongiorno.
- E ti?
- Ghe mande quea de un baro de saeàta, o i pumidori che deventa rossi, o dée more che scuminsia deventar nere.
- Ciò Bepi!? Ma no te sta manco meter dentro ’na sestèa un fià de verdura e portarghea? E fursi a te ricanbia ànca co’ un baseto!
- Te à rasòn Toni! Satu che no ghe vée pensà!
- Scoltame mi Bepi, par l’amor de Dio! Buta via ’sta tràpoea, bevi ’sta onbra e torna quel che te si senpre stat!
- Aea saeute Toni!