El can l'é bel, ma i amissi i è meio!
Fameja Alpina > Toni e Bepi
Toni e Bepi
di Isidoro Perin
El can l’è bel, ma i amissi i è meio!
- Ciao Toni! Finalmente un’onbra al bar!
- Ah! Te si ti Bepi, co ’a mascherina no te vée conossù.
- Oramai ’a mascherina la è pi’ inportante déa pastiglia pàa pression!
- E déa patente, ànca parché el vigìe el vede e ’l me conosse, ma ’l covid el me conosse ma mi no’l vede!.
- ’Stano non ghe n’è in giro gnanca ’na sagra par curarse do costesine o ’na brisiòea. L’è ’na tristessa.
- Ghe n’è ’l proseco che ’l va ’seo sue cantine, che par noaltri alpini l’è quasi un sacrilèio, sperén de recuperar in seguito.
- Però ’a ’sente vol ’ndar in ferie istesso.
- Ah! Sì! Sì! Tuti al mar, fracài come ’e sardée…
- E in montagna!? Un chiometro de coda par ciapàr ’a funivia.
- Ma se co’ ghe ièra el “locdaun” ’i ièra tuti fora a corer, che ’i véa bisogno de far movimento.
- I can ghe tochéa pissàr diese volte al dì par far ’ndar fora i paroni.
- Adess, pore bestie, ghe toca ànca tegnér duro pì de qualche volta!
- A proposito, mi no ò mai vist in giro tanti can come i ultimi ani.
- Ciò, ma el can l’è el meio amigo del’on.
- Eh! Pol esser! ’I se marìda, dopo un ano o do ’i se àssa, e dopo te ’i vede in giro co’ un can par on, ma no co’ un can da paièr, bisogna che’l sia un can de rassa, che no ’i sa gnanca come ciaparlo, che ghe toca ’ndar dal veterinario par farse insegnar, però vutu metér.
- Sarà ànca vero che ’l can te capisse, ma mi preferisse capirme coa ’sente, magari catar da dir, ma vardarse sui oci, e prima de romper un’amicissia pensarghe sora pì de ’na volta.
- Ghe vol pi’ sc-hei par far ’na barufa che par far su ’na casa.
- E un fiòl l’è senpre meio de do cani, ànca se ’i è de rassa!
- Sensa contar Bepi, che ’l dotor l’è gratis, e invesse el veterinario te ò paga.
- Aea saeute Toni! Tira ’so ’a mascherina e bevete ’sta onbra de nero.
- Aea saeute Bepi! Cussì ghe fén fronte al Covid da veci alpini!