E prevision del tenp
Fameja Alpina > Toni e Bepi
Toni e Bepi
di Isidoro Perin
’E prevision del tenp
- Ciao Toni! Bevetu un’onbra?
- Vuintièra, ànca se son rabià!
- Co’ chi la àtu po’?
- Co’ chi che fa ’e prevision del tenp, e co’ chi che ’e varda!
- Dime che te la à co’ tuti, che sten manco.
- Senti, cossa vol dir “probabilità di pioggia al cinquanta per cento?”
- Che te sta manco butar par aria diese s-chèi!
- ’A ’sente no vol capir che ’l tenp l’è restà da maridar par far quel che ’l vol, e che àa natura no se ghe comanda.
- ’I pretende che vegne fora bel tenp parchè ’i à prenotà l’albergo; dée prevision fate àa teevision ’i capisse quel che ’i vol.
- Adess po’ i fa ’e prevision come se è fusse un varietà co’ ’e signorine vestìe che par senpre ’l sol fora!
- Cussi ’a ’sente invesse de vardar a carta geografica ’i varda da n’altra banda e dopo no ’i capisse pì gnent.
- Me par de véder su’ ’e case (L’on): - Tasi su che son drìo vardar ’e prevision!
- (E dopo ’a femena): - Cossa ài dìta del tenp?
- El sòito: no me par che ’l canbie: ’a “meteorina” la à ’l davansal fiorì senpre conpagno!
- Me amigo che ’l féa ’l meteorologo ghe ha sucess ’na volta che ’a femena dovéa ’ndar in ’Merica co’ l’aereo, ma ’a véa paura del tenp. La à scuminsià a tontonàr l’on ’na setimana prima. Sicome che lu no’ ’l savéa pi’ come cavàrsea, l’à portà casa ’e carte dée previsiòn, che l’è capìa poc ànca lu: - Vedetu femena, qua su’ l’Atlantico ghe n’è ’na perturbassion. No so se ’a passa sora, se ’a passa soto o se ’a me ciàpa in pieno!
- Però el Governator Zaia el se à rabià parchè co’ ’i meteorologi sbaglia, i “operatori turistici” ’i perde s-chèi.
- Se va par quel, ànca quando che ’i sbaglia i poitici noaltri perden s-chèi e nessun me à mai rinborsà calcossa fin dess.
- E ricordate ben che ’l tenp cambia, ma i poitici no!
- Àa saeute Toni!