Che rassa de crisi!
Fameja Alpina > Toni e Bepi
Toni e Bepi
di Isidoro Perin
Che rassa de crisi!
- Ciao Toni! Bevetu un’onbra?
- Ghe vol coraio dir saute co’ ’sti ciari de luna.
- Se i afari va mal el corpo no l’à da patìr!
- Toni!... Te rendetu conto che l’è rivà ’a crisi!
- Ma no! La è tuta impressiòn! El capo del Governo l’ha dita che bisogna esser otimisti, che bisogna spender come prima.
- Toni! No ghe n’è pi’ s-chèi! Ho pers el lavoro e no me ciòl su nesun parchè son massa vecio!
- Càtate calcosa da far! No te ha sentì Berlusconi!
- Lu ’l va ben’ parlar e ànca, bisogna dir, ’l sa contarla! Vorìa vederlo al me’ posto!
- Però bisogna dir che i è drìo provarle tute pa’ risolver ’a crisi: te à vist che adess te pol ingrandìr ’a casa del vinti par sento.
- Son contento pài siori che i à ’a casa al mar: cussì i pol farla deventar ’na villa!
- Però mi non son tant persuaso de ’sta crisi: ’e machine le è senpre quée, ansi le è senpre pi’ grande, ’a ’sente ’i è senpre picàì su pal teéfonin…
- Te à rason! Pensa che ièri altro, ière dal frutariol e un omenét el ghe ha teéfonà aea femena: “Cara ti prendo il cavolfiore bianco o quello verde?... Come?... Non ti sento!... Non ò canpo!...” – Par farla curta ghe costéa manco tuti dò i cavolfiori che ’a teéfonada!
- ’A ’sente non vol pi’ rinunciar a gnent: ’i vol a teévision “ad alta definissione” ànca se no ghe n’é gnancora ’e trasmission, i abonamenti ae partìe, ’a paestra, ’a piscina, ‘a paruchiera, el manicur, i vestiti novi ogni staiòn!…
- ’Na volta no se butéa via gnent. Co’ se véa finì ’a naia bisognéa riconsegnar el corredo, e quel che manchéa ’i se ’o tegnéa sua decade.
- Mi che ière el fradel pi’ ’soven ho vist un vestito novo el dì dea cresema, che me ricorde ’ncora che ’e maneghe me quersea ’e man, parchè cussì el me duréa un ano in pi’.
- Bisogna sparagnar co’ i ghe n’è, parché co’ ’i manca no te pol pì farlo!
- Adess ghe manchéa ànca el teremoto in Abrusso, ’na tera che ’a è piena de alpini.
- Par quel son pi’ tranquìo, parché dove che ghe sen noaltri ’e robe va senpre un fià méio.
- Sperén che nesun ghe passe pàa testa de magnarghe sora!
- Bisogna dìrgheo ciaro ai nostri fradéì alpini abrussesi: Tendeghe!
- Aea saeute Bepi! ’Vanti, sempre driti e testa alta! Pianderse doss’ no serve a gnent!