Bisogna vardar 'a luna giusta!
Fameja Alpina > Toni e Bepi
Toni e Bepi
di Isidoro Perin
Bisogna vardar ’a luna giusta!.
- Ciao Toni! Férmete qua!
- Asseme ’ndar che me à ciamà me Barba Jiio.
- Cossa vòeo!
- L’è rabià co’ so dénero, che l’à ’sa scuminsià a zharpìr ’e vide.
- Ma se l’è ancora ’a luna de otobre! E po’ ghe n’è ancora su ’e foie!
- Pensa che co te ’e stàia ’e piande come sua vèrta.
- Mi me par che i contadini i à pèrs ’a bùssoea.
- Bepi, adess no ghe n’è pì contadini. I vigneti i è stai conprài da zente che à fat i s-chei e ’i ghe n’à cussì tanti che i conpra un fià de tut.
- Cussì ’i se mete far su case che co’ passa un camion in strada vien ’so ’e malte.
- Se ’i fa su un pont, dopo te vede che fine che ’l fa.
- Adess sen drio veder coi vigneti, parchè se te ghe fa far el lavoro a chi che costa manco, cossa vutu che vegne fora.
- I crede che par far i contadini non serve studiar, ma no ’i sa che un contadin l’à da conosser ’a tera, vardàr ’e stée, ’e staiòn, ’a luna, l’à da savèr leser ’e nuvoe, el vent…
- L’à da savér ’a storia, ’a matematica, l’à da saver conprar e vender…
- E tut sensa ver tre laurée de carton picàe sul tinèo.
- Adess non se lavora pì coe man: tratori da sentomie euro, machine par dar solfato (che no l’è pì solfato), machine da tirar do ’a ùa.
- Pa far passar ’e machine ’i taia i cavi de fianco e desora ’e vide coe “falciatrici” che dopo’e me par messe in fìa come i soldài, tute squadrae, tute conpagne!
- No ’i se rende mia conto che se ’na vida la è maeàda sui cavi ’i ’e inpesta tute.
- E i cavi passora le è ’e femenèe, quée che iùta a tirar su el suchero sua ùa co’ a vien fàta: se te è taia te perdi sul grado.
- Adess che tuti à studià ’i dirà che sen i sòiti veci che non se capisse ghent.
- El vin no se ò fa col teéfonin o col conpiuter ma col servèl e col sudòr.
- Aea saeute Toni!
- Aea saute Bepi! Causa toa me tocarà sentirle dal barba Jìio!
- Dighe che te si drio lavorar par salvar el futuro dei Alpini: guai a restar sensa vin!