Alpini "Amarcord"

Fameja Alpina > Toni e Bepi

Toni e Bepi

di Isidoro Perin

Alpini “Amarcord”

Ciao Toni! Bevetu ’n’onbra?
No posse. Son in lutto.
Parchè?
Adess che i me ga tornà ’a patente me ga mancà l’avocato.
Ànca a mi me jol el cuor. Ma cossa vutu far? Chi more el mondo assa e chi vive se ’a passa. E po’ se i afari va mal el corpo no gà mia da patir. Bevi qua che te te tira su.
Saeute! Ti te sa che mi go senpre comprà Fiat fin dàa siesento usada coe porte che se verdéa par davanti.
Mi me ricorde invesse che ’a prima machina che gò guida ’a iera la (1)“Gip col pel” ostrega!
Se me ricorde! Co’ te vedée passar col mul me vegnea i (2)sgrisui ’so pa ’a schena.
Pensar che in tenp de guera chi che ’vea ’l mul el ièra fortunà.
Ma dopo, coi ani sessanta nessun voea ’ndar in (3)salmeria a far ’l conducente.
Tutti voéa ’ndar far (4)el distrutor de paracari.
Cossa ditu po’?
El (5)“soffèr” Bepi, magari portar a spasso el Comandante in “Campagnoea”.
O magari portar ’l maressiàl de cusina in magasin vetovagliamento, come che fée mi.
Cussi te sgraffignavi qualche ciocoeata, che ’a ièra cussì bona… Bisogna dir però che te si senpre stà un amigo, te me ha senpre procurà el suchero par Urio, che ’l ièra ’l mèio mul del 6° de Bellun, ma ’l ieèra vissià come un tosatèl; pensa che par montarghe el basto me tochéa farghe far diese giri dea caserma!
Toni! Te par che sia ’na roba justa far tornar i mui par mandarli in Afhganistan?
No eo so. Dopo diese ani diventa difissie ànca trovar conducenti e maniscalchi come che ’l dise el sindaco Gentilini. Tegner un mul no l’è come usar un compiuter, un telefonin o ’na machina col climax. Ghe vorìa fiòi de contadini che ormai la è ’na rassa in via de estinsiòn. Adess po’ che i è tutti voeontari, chi vutu che ’o vòia ’l mul!
Ai nostri tenpi ’sa me paréa de esser i paroni del mondo noaltri che se guidéa ’l CL col blocco diferensial dadrìo ’a schena.
Infatti ogni volta che te te ’o desmenteghéi bloccà àa prima curva streta te saltéa ’l giunto e ti te restéi a pié co’ (6)sinque zornae de cipierre.
Pensar che adess, co ’a crisi che ghe n’è, i camion i te i tìra drìo col sconto, a rate sensa interessi, e i mui invesse ghe toca ’ndarli conprar in Jugoslavia.
Basta che no ’a ghe toche come a poro Nani da Lovadina.
Parchè, cossa ghe aeo caapità?
El ’vea ‘na (7)mussa vecia e l’ha vendùa par conprarsene una de nova àa fiera de Santa Lucia. L’à passà in rassegna tute e bestie e el se à innamorà de ’na musseta che ’a ghe someiéa àa soa, ma a ièra bea, lustràda, col pel curt e ben (8)strigà. La à conprada e l’è tornà casa a piè co ’a so’ mussa. Ma co’ l’è rivà in piassa Lovadina ’a bestia ’a ghe à scanpà, e lu còreghe drio fin dentro ’a staea!
No stame dir che ’l vea conprà ’a so’ mussa vecia!
Sii! ’A ièra proprio ’a sòa!
Sperén che no ’a ghe toche ai nostri alpini!

Glossario:

(1)Gip col pel: Mulo - (2)sgrisui: brividi - (3)salmeria: trasporti col mulo - (4)el distrutor de paracari: L’autista - (5)soffèr: autista - (6)sinque zornae de cipierre: cinque giorni di prigione - (7)mussa: asina - (8)strigà: pettinato.

Stampa