A guera te pol sol che perderla!

Fameja Alpina > Toni e Bepi

Toni e Bepi

di Isidoro Perin

'A guera te pol sol che perderla!

Ciao Bepi! Bevetu un’ombra?
Grassie Toni. Che vin éo meio coa suca?
Ostrega, bisognaria dimandarghe a un che se ne intende.
Manco mal che non son mi sol. Co’ ghe iera me nona la metéa ’a suca sul forno dea cusina economica e ’a me n’dea un toc par-on, par far marenda; nessuni savéa che co’ ’a suca se podéa far piàti da siori.
E po’ ghe ièra e suche porzheère che no ’e savéa da gnent e se ghe ’e déa al porzhèl e ae vache.
Mi no ò mai vist me nona far i gnochi coa suca, far ’a suca in saòr, in agrodolce...
Ciò ma adess sua teévision no se vede altro che roba da magnar e cuochi che t’insegna come far.
Toni, intanto no sta ciamarli cuochi, varda de ciamarli “Chef” si no ’i se ofende.
Soto ’a naja el “Chef” e ’a suca no se ’i à mai visti: patate e pastasuta fin che basta, e la me é ndata ben cussì!
Comunque par no sbagliar el vin, secondo mi, mèio el proseco che l’é come el Papa: el va d’acordo co’ tuti.
A proposito de ’ndar d’acordo, ’i é drìo far guera dapartut.
’I se copa, ’i bonbarda ’e case, ’i se ’a ciapa coi tosatei.
’I é deventai bestie, ansi ’i ièra cussi ànca prima.
Pensar che nessuni vinse ’a guera. - L’é vero, ma i poreti ’i ’a perde prima de tuti.
Ghe n’é ànca quei che fa finta de iutarghe: ’i vol far da mediatori, ’i ghe promete de iutarghe a far su ’e case, co’ ’a guera la é finìa, (e intanto i ghe mete in conto ’e spese).
Me sa che quando che ’i finisse de far guera, quei pochi che resta, ’i varà bisogno de tanti mureri e de tanta pietà.
E te pol star tranquìo che a iutarli sul serio ghe sarà senpre i poreti, che ’i à senpre fat i mureri, parché pai siori l’é massa fadiga!
Aea saeute Bepi!
E no sta pensarghe massa aea guera Toni, si no te ris-cia de perder ànca ’a saeute!