A fulgore e tempestate...
Fameja Alpina > Toni e Bepi
Toni e Bepi
di Isidoro Perin
“A fulgore e tempestate libera nos Domine”
- Ciao Toni! Bevetu un’onbra?
- Ehilà! Bepi! Come statu?
- Benon! A ti no ocore dimandarteo: basta vardarte. Te me par (1)un pomo fat.
- A proposito te gà sentì che stano ’e vendeme le ’se de prima quaità.
- Meio par noantri che ven da bevar, ma chi che gà ciapà ’a tenpesta no i ’a pensa cussì.
- Varda che ’a tenpesta la è sempre stada. ’Na volta a vien da mi e ’na volta ’a vien da ti.
- Chissà parchè ’a casca senpre dai poreti. ’Na volta se preghéa parchè no ’a vegnesse. In maio se fea ’e rogassion. Tuti in procission cantando ’e litanie dea Madona ae sinque dea matina, e sue (2)crosere i parecea un altarin pa far ’a benedission.
- Te sentìa cantar da distante; no ghe ièra ancora l’inquinamento acustico. Me ricorde che me nona ’a ghe metèa soto l’altarin ’na (3)sestèa de vovi, cussì ’l piovan podèa conprarse calcossa da magnar. Se parecèa ’e crose da meter sui pai dèe vigne par tegnèr distante ’a tenpesta e co’ vegnea su tenp se inpissea ’a (4)candea dea seriòa.
- Te ricordetu che se ’ndea dal (5)casuìn coi vovi par conprar el suchero, el sal e l’oio.
- Mi invesse ’ndee sui coàt, ghe portèe via i vovi a me mare, e ’ndèe a conprarme e (6)baete de sfrasia par zogar co’ se vegnèa fora da scuoea. ’Na volta ’a me gà pescà, ’a me ha fat i (7)variss sue ganbe co ’a (8)vis-cia de sanguanèa!
- Co’ ièra ’a Setimana Santa no se vedèa ora de ’ndar dir i matutini, anche se dei salmi in latin che no se capìa gnent. Bastèa poder sonar ’a ribega. Se fea un gran fracass e se profitèa par inciodarghe el tabaro sul banco ai veciòt.
- Adess, se i fesse cussì i nostri fioi, se farìa el finimondo.
- L’è vero. Noialtri, co’ se ièra tosati, se podèa sbagliar sensa pagar. Uncuò i nostro fioi i me fa pecà. Se dise che par inparar bisogna sbagliar, ma lori no i pol farlo.
- Se noaltri se vegnea casa ciochi, co ’a bicicleta, al massimo se podèa ’ndar sul foss, ma adess?!
- Te pol sassinar ’na fameia e ànca do.
- Vedetu el progresso cossa che ’l fa. Bisogna tornar a far tesoro dee paroe e dee tradission dei nostri veci.
- Toni assa perder ’e memorie, che i veci me gà magnà i s-chei e mi gà assà i proverbi. Bisogna ver el coraio de vardar davanti e rangiarse.
- Par noialtri alpini no l’è mai stat un problema; ansi sen qua pr insegnargheo ànca ai altri.
- Quei che vol o che i pol capir però! Àa saeute Toni!
Glossario:
(1)un pomo fat: una mela matura - (2)crosere: crocevia - (3)sestèa: cestino - (4)candea dea seriòa: candela della Madonna della ceriola benedetta - (5)casuìn: droghiere - (6)baete de sfrasia: palline di terracotta dipinte - (7)variss: varici, grosse bolle - (8)vis-cia de sanguanèa: ramo sottile ed elastico di corniolo selvatico.