'A guera in direta

Fameja Alpina > Toni e Bepi

Toni e Bepi

di Isidoro Perin

’A Guera in direta

Ciao Toni, bevetu un’onbra?
Co' stoo séc ò 'na sé, vae col proseco!
To' tute 'e vide che 'i à piantà ghe n'è pi' vin che aqua!
Basta che no 'i me tire bombe su caneva.
Ciò, ma a ti Toni, no 'a te par un fià strana stà guera qua.
Mi capisse poc, ma co' 'i a dita che iera cascà e bombe su un asìo e, par fortuna, iera mort sol che do giardinieri, son restà co' 'a boca verta: cossa fei là do giardinieri, che adess 'a tera la e iassada... ghe metéi el paltò ae primue?
Ah! parché cossa se ne faeo de un carro armato russo el contadin chel se' o' à portà casa col trator?
Magari nol sarà gnanca bon de meterlo in moto, e po', a chi ghe tireo?
Cossa vutu che te diga mi, el se farà un punèr pae gaine!
E te par de vedar 'a sioreta che fa da magnar, che 'a vede el "drone" passar, e la 'o busa 'so co' un vaset de cucumeri soto 'seo!
Però 'a RAI me fa veder 'a guera in direta, come 'na partìa de baeon!
Me par de vedar: -Pareciate col colpo in canna, conta fin a diese, e dopo spara che cussì vien fora 'na bea ripresa!
A proposio de baeon àtu vist l'ultima partìa de l'Italia?
Me par che 'ià fat ptoptio 'na bea "Macedonia"!
Me dispiase par quei che ghe tienm ma fursi l'è ànca ora che 'i vae vardar 'e gare de quei che no ciapa schei, ma 'i dà l'anema, 'i porta casa medaie e 'i è un esempio pai nostri fioi.
Ai nostri 'sogadori del baeon ghe digo che 'i se vergohne magari 'na sc-ianta, e che 'i se fae passar a rabia, magari co' 'na bea insaeata russa, che de sti tempi 'a va de moda!
Aea saeute Toni!
Aa toa Bepi, e a quea de tuti i alpini.