W el domiedisdoto, ...
Fameja Alpina > Toni e Bepi
Toni e Bepi
di Isidoro Perin
W el domiedisdoto, sento ani dàa Vitoria!
- Ciao Bepi! Bevetu un’ombra?
- Magari ànca un spriss, parché bisogna star sobri!
- Ò so! Dopo ste votassion ghe n’è tuta l’Europa che me varda parché ’i vol veder se ven grìi pàa testa, magari ànca co’ sinque stée.
- Cossa ditu po’ Toni! Varda che ’a nostra la è ’na democrassia sòida!
- Par quel l’è vero! Noaltri ghe den ’a paroea a tuti quanti, ànca a quei che ’i à fat i teroristi e che ’i à copà Aldo Moro e ’a so’ scorta.
- Te à vist l’Adriana Faranda in catedra come ’na profesoressa?
- E ò ànca sentì ben cossa che la à dita: - Che far ’a vitima la è deventada ’na profession!
- Parché copar ’a zente invesse cossa eo?... Un passatenpo?
- Assa perder Bepi, si no te te spachi el figà ànca co’ un spriss!
- St’ano finalmente se fa festa pai sento ani dea fine dea prima Guera Mondiae!
- El quatro novenbre de st’ano la è finia! Dopo basta far festa. L’inportante l’è che reste ’a memoria.
- Ciò, ma varda che tute ’e mostre sua Grande Guera ’e à vù un gran sucesso de publico e de fioi dèe scuoe.
- Mi me à piasest tant ’a mostra al museo dea “Battaglia del Solstizio” de Nervesa, quea dée scatoete de carne, de ton, de pumidori, parfin de aragosta, de macedonia …
- Quee pi’ bone ’e ièra pai comandanti, no pai soldai!
- Comunque l’Italia ’a véa puntà tant sui viveri che podéa durar.
- Invesse i Crucchi, poreti, no ’i véa quasi gnent de tut sto ben de Dio!
- A proposito, te ’o sa parchè i taliani ’i à scuminsià a ciamarli “Crucchi”?
- No!?
- Parchè co’ i todeschi vegnea fati presonieri e féa altro che dir : - Kruch! Kruch! Kruch! Che voea dir: - Pan! Pan! Pan! E i féa segno coa man sua boca, poreti!
- No ’i véa ’e scatoete de carne da magnar! E gnanca ’l pan! L’è ànca par quel che ’i à pers ’a guera!
- E cussì par noaltri taliani ’i è deventai Crucchi!
- A mi me basta che no se fae pì guere: i monumenti e ’e lapide che ghe n’è in giro dapartutt le è ’sa massa tante.
- Aea saeute Bepi!
- Ànca a quea dei Crucchi Toni! ’A guera no la è stada né colpa soa, né colpa nostra, parchè, come che diséa me nono: - ’E guere vien fate dai siori par copàr i poreti! Ricordateo!