Vemo vinto 'a guera del baeon... mesa!
Fameja Alpina > Toni e Bepi
Toni e Bepi
di Isidoro Perin
Vemo vinto ’a guera del baeon… mesa!
- Ciao Toni! Ciapa qua un’onbra!
- Aea saute del’Italia!
- Quaea? Quea dei scàndai o quea del baeòn?
- Atu vist che rassa de festa!? Gnanca co’ vemo vinto ’a guera del ’15-’18 non ghe ne stà un trionfo cussì.
- Pensar che vemo vinto co’ ’na squadra de serie “B” e co mèsi ’sogadori co’ un pié in serie “C”!
- Ghe n’è pi’ bandiere e amor de patria par ’na partìa de baeon che par ricordar ’a nostra storia.
- Pensar che i nostri veci i se gà sacrificà par darme ’na patria e ’a libertà; no ’i se varìa mai sognà de far festa usando ’a bandiera come un ’sogatòl.
- Me nono, co’ l’è tornà dàa Prima Guera Mondiae, come premio pàa vitoria, i ghe ha dat un tòc de (1)arzen del Piave da segar l’erba par diese ani. Cussì l’à podest mantegnerse ’na vaca e ver un fià de late pa’ i so’ fioi.
- Invesse ai nostri eroi del baeon i ghe dat dusentosinquantamie Euro a testa, sperando che i réste contenti!
- Atu vist che rassa de piova a Berlino!?
- Quée e ièra e lagreme dei tedeschi coe do pisse sul stomego da digerir!
- A proposito de piova semo ciapai mal ànca qua in Italia. Ogni volta che fa un tenporal se va soto aqua e dopo tre dì de sol semo in séca.
- Par forsa, ’na volta se semenéa el suturco ’na pianta ogni trenta s-chei, adess se ghe ne mete do. Co’ ’l scuminsia subiar, in do dì, te perde metà racccolt.
- ’Na volta ghe ièra i foss dapartut, coe rane e ’e spinarioe, adess i vol tirar via ànca e canaete; dove ’ndarai bever i faiani, i lieveri e chealtre pore bestie?
- Bisogna sparagnar Toni, parchè se manca l’aqua la deventa dura par tuti.
- Mi me piase essere otimista Bepi; vegnarà un raccolt pi’ magro, ma col secc el vin el vien pi’ bon.
- Te gà rason. Àea saeute Toni!... Al futuro dei vigneti, che par l’Italia i conta pi’ dée partìe, visto che semo i primi del mondo ànca sul vin.
- Co’ ’na diffarensa però: che dopo qualche bastonada i nostri vignaioi gà inparà a rigar dritti.
- Sperem che i a capise ànca quei del baeon.
Glossario:
(1)arzen: argine.