Un pachét de cafè!
Fameja Alpina > Toni e Bepi
Toni e Bepi
di Isidoro Perin
Un pachét de cafè!
- Ciao Toni! Bevetu un’ombra?
- Bianco, grassie.
- Dove vatù co’ ’a sporta de pàia?
- A botéga po’. No te sa che no se pol pi’ usar ’e borse de nàilon?
- Bravo! L’è cussì che se ghe insegna i vaeòri ai nostri fiòi!
- Ma quai vaeòri! Uncuò i unici vaeori che conta ’i é i s-chèi!
- Varda che no tuti ’i ’a pensa cussì. El prete de Santandrà ’l sòna ’e canpane in terzha co sèra ’a “Borsa”.
- Parché?!
- Parchè ànca pa’ uncuò ’i à finì de robar s-chèi dàe scarsèe dei poreti.
- Bisogna canbiar calcossa. No se pol star co’ ’e man in man: ’na volta i vaeòri ’i ièra sacri!
- Me ricorde co’ ière soto naia, ’l maressial el me à mess a far el magasinièr, co’ tanto de ciave dopia.
- Me par de vèderte che bel che te ièra!
- Spéta! Ghe ièra un sac de cafè da sinquanta chìi, e ogni matina me tochéa masenarlo, a man, pài maressiài e i ufficiài.
- Satu che gusto, star là mes’ora a menar ’l mànego!
- ’Na matina mete ’a ciave sua porta, vèrde ’l magasin e vede che ’l sac de cafè le caeà de un bel toc!: “Maresciàeo l’è sparì ’l cafè!” “Chi è stato?” “Se ’l vésse catài ghe varìa tirà ’l còl!” "Stiamo attenti e facciamo silenzio: vedrai che lo trovo!” “Va ben maressiàl!...” L’è passà qualche dì e no ò pì sentì parlar de cafè. Ostrega! Vùtu véder che l’é stat lù!
- Ghe atu rivà?
- Dopo ’na setimana son ’ndat casa in licensa. Me son scont un scartozhét de cafè sul fondo déa borsa e co’ son rivà casa l’ò mess sora a tòea. “Da dove vègnea chea roba eà!?” Me pare l me à fat vegner i sgrìsui. “Dal magasin déa naja!”. “E chi te à data?” “Me à son ciòlta, come che fa ’l maressial!” Me pare ’l me à tirà ’na peàda sul cul che ’l me à levà da tera davanti a tuti me fradèi: “MONA! ÉO QUESTO QUEL CHE TE À INSEGNÀ TO PARE E TO MARE!?
- …Pensar che no é passà gnanca sinquanta ani!
- Àa saeùte Toni!