Tuti mati pa' 'l baeon
Fameja Alpina > Toni e Bepi
Toni e Bepi
di Isidoro Perin
Tuti mati pa’ ‘l baeon
- Ciao Toni! Bevetu ’n’onbra?
- Vuintiera, ma che’l sia un proseco frisante.
- Gatu da far festa?
- Varda che st’ano ga vinto tuti quanti! No te ga visto ’e olimpiadi?
- Te gatu ’sa desmentegà el calcio?
- Ma no te ga vist che i nostri tosati ga ciapà ’a medaia de bronso? E ànca ’se sta’ beo vedér insieme i ’sogadori dell’Iraq farse ’na fotografia coi nostri. Pecà che ’l dì prima sia stà copà un nostro giornaista. Chissà co’ vegnarà un fià de pase su chea pora tera cussì piena de storia e de civiltà.
- L’è vero, te gà rason, ma no stà far el furbo par no pagar el dassio. Tornemo sul discoso! No te ga visto ai europei ’a nostra nassionae che facia de bronso? L’è proprio vero che i ’taliani i è magna e desmentega. A proposito Toni, da chi vatu a taiarte i cavei?
- Mi vae ancora dal me vecio amigo “Cociss” e me ’a cave co’ manco de diese euro, ma cossa c’entra ’l me barbier?
- Mi no ’ndarae mai a farme i cavei dal paruchier de Vieri.
- Parchè???
- No te ha vist che pur de no strasarse ’a permanente el se ga fato segnar un gol, pensa cossa che’l pol costar un taio de cavei!
- Ti te si masa cativo. No te pensi al spirito sportivo: pur de no far un rigor non l’à gnanca moss ’na man!
- A proposito, no te par che e nostre società de calcio ’e spende un fià massa s-chei? E dopo e pianse parchè le è piene de debiti.
- Semo tuti che ghe piase spender e spander, ma ghe n’è qualchedun che magna un fià massa.
- Adess me par che’l Napui l’abia vist daa Parmalat e daa Cirio come che se fa a far un sugo de late e pumidori e che ’l stae provando ‘na risseta nova.
- Ho paura che ’a sia un fià (1)stomeghina!
- Ma no sta creder che ae olimpiadi ’a sia ’ndata meio. No te ha vist che rassa de manfrina co l’anti doping?
- L’è proprio ’na vergogna! Rivar a cusirse ’na fiaeta de urina in meso ae ganbe par far finta de esser pì bravi!
- Ma questo no è gnent. Se te pensa che sue nostre gare amatoriàe, qua sui nostri paesét, ghe n’è pàri de fameja che se droga par poder portaghe casa àa femena e ai fioi ’na medaieta de latta!
- La é ’na piaga vecia. Ma ànca noaltri alpini gavemo calcosa da sconder. Te ricordetu soto naia coi mui. Ghe ièra senpre qulchedun che ghe féa far “strecing” sue gambe dadrìo metendoghe el pevaro soto ’a coda, o che ghe passéa qualche onbra de scondion! E co’ rivéa ’e reclute che i ghe fea far ’a comunion?
- Par fortuna che no ghe ièra i contròi antidoping e gnanca l’etilometro si no se varìe pers ‘a patente dea “Gip col pel” e sarìe stai squaificai parfin i nostri mui!
Glossario:
(1)stomeghina: nauseabonda.