Tenpi de Coronavirus
Fameja Alpina > Toni e Bepi
Toni e Bepi
di Isidoro Perin
Tenpi de Corona Virus
- Ciao Toni! Situ ti Bepi?
- Son mi! Son mi! Te sa che adess se pol sentirse sol che par teèfono. Mi son qua casa. E ti?
- Ànca.
- Son qua col capèl in testa e un’onbra sora ’a tòea. Vedi de farlo ànca ti.
- Speta un minuto che vae in camera ciòr el capel sul’armeròn. Intanto passe in caneva e tire su ’na butiglia; èco adess me ciòe un goto e me sarte l’onbra.
- Àea saeute Toni!
- Quàea saeute Bepi, parché noaltri Alpini sen quasi tuti veci!
- Bisogna tegner duro Toni! Parché noaltri sen ’a memoria storica, sen ’na forsa de sostegno moràe pai ’soveni. Co’ varde ’a nostra Protession Civìe che ’a monta l’ospedàl da canp a Bergamo, vorìa eser là e me vien da piànser. Toni!
- Noaltri ven fat ’a nostra part. Adess bisogna star casa par no far dàni.
- Co’ varde a ’sente che fa ’a coda par conprar un mucio de roba che no serve, sol che pàa paura de morir de fame me vien ànca da rider.
- Pensar che fin l’altro dì ’i ièra in coda dal “nutrizionista” par far ’a dieta “ipocalorica”. Adess ’i à paura de restar parfin sensa carta igienica!
- Se va par quel ’i pi’ tanti reclàm ’i è de lassativi, antidiarroici, pàa prostata, pàe mudandine par incontinenti e ànca dea còea pàe dentiere.
- Pensa quant inportanti che sén. Se ’l corona virus continua cussì me sa che ’e industrie perde un sac de clienti.
- ’I me à slongà a vita Toni, ma se perde tòchi dapartut come ’na machina vecia! Bepi! Ma noaltri no se fermen, ànca parché mi vui ’ndar aea prossima Adunata che ’st’ano ’i la fa dopo l’istà par colpa del corona virus.
- E mi invesse no me basta, parché vui rivàr a sento ani, se no altro par farghe rabia all’Inps.
- Aea saeute Toni!
- Bravo Bepi! Se sentìn doman