Sempre pì moderni!
Fameja Alpina > Toni e Bepi
Toni e Bepi
di Isidoro Perin
Senpre pì moderni!
- Ciao Toni! Bevetu un’onbra?
- Sì Bepi! Basta che no’l sia proseco de spina perché te sa che no se pol pì venderlo cussì.
- Par no sbagliar ciapa qua un merlot!
- Bepi, àtu sentì che ’i à catà n’altro segno del’oroscopo!
- Toni! Cossa te àtu fumà?
- No! No! ’i à trovà che ghe n’è l’Ofiuco.
- Parla pian che ghe n’è fiòi.
- Ma no! L’Ofiuco el sta tra el Scorpion el Sagitario.
- E l’è stat scont fin dess?
- Ma no! La è ’a prucission dei equinossi che se sposta a causa dea variassion del’asse dea tera.
- Cossa centra ’a prucission Toni: - Schersa coi fanti e assa star i Santi! - Situ stat dal dotor a farte veder?
- Dal dotor non vae quasi pì. Tanto ’e rissete pàa pression basta che ghe e mande via “mail”.
- Senti, vutu dirme che te ciòl e pastiglie’ par compiuter…
- E ciò!
- E come fatu pae suposte!
- Ma va eà Bepi, che te ga n’à senpre una!
- A proposito de saeùte. Atu vist che ’a vita se slonga par tuti oramai…
- Sì! Me va ben viver sento ani, se ghe n’è ’a saeùte però.
- Quea magari bisogna contentarse magnando qualche pastiglia.
- E tegnér dura ’a pension par farghe rabia al’INPS… e poder ’ndar ae nostre Adunate par far festa coi nostri Boce!
- ’Ndarà finir che se ghe costa massa al governo.
- Ànca se ’e gambe no ’e te porta pì, magnar no te pol, bèer gnanca, l’è senpre mèio star qua ànca tirando fià par soto un brass!
- Te à rasòn Toni, almanco fin che te si qua te pol senpre veder i to fiòi e i to nevòdi.
- A mi me piasarie vardar ànca qualche femena, ma i ociài no fa miràcui!
- Ma te pol senpre ciòr el viagra!
- Ànca quel par compiuter?
- Prova!
- Àea saeùte Bepi!