Sempre pì Alpini!
Fameja Alpina > Toni e Bepi
Toni e Bepi
di Isidoro Perin
Senpre pì Alpini!
- Ciao Toni! Bevetu un’onbra?
- Vuintièra, ò ’na sé! E po’ uncuò ò bevù tanta aqua che me sente ’e rane sua pansa.
- Oramai bisogna rassegnarse: o ’l vin o ’a patente! Par fortuna che al’Adunata de Pordenòn se pol ’ndar in treno.
- Ciò, àtu vist bandiere che ’i à mess fora?
- ’I dise che i Alpini ’i è senpre manco, ma mi vede Alpini dapartut!
- Se ’i fa ’na sagra ghe n’è i Alpini, se ghe n’è ’na prucission ghe n’è i Alpini.
- Se un foss va passora ghe vol i Alpini, se serve ’na man pai ansiani ghe n’è i Alpini.
- Se un sindaco l’è in dificoltà ’l ciama i Alpini, se te vol ’na serata de cori, de tatro, de cultura basta ciamar i Alpini.
- Cossa ’ai da ver sua testa, pena soto ’l capèl?
- Ricordate Bepi che ’a nostra bestia l’è ’l mul e no digo altro!...
- E ’stano che vien l’è l’Aniversario del’inissio déa Grande Guera.
- Dapartut no se parla altro che de quel.
- Mi spere che no ’a devente ’na scusa par far baldoria parchè ’e guere le è senpre stàte ’na gran ciavàda pai poreti.
- Te à rasòn Bepi! ’E guere le é state ineventàe dai siòri par copàr i pori can.
- Tanti ’i è ’ndati in guera sensa saver cossa che voéa dir a paròea “Patria”, ànca parchè ’i ièra senpre stati in casa, in césa e sui canp a lavorar ’a tera.
- Ma ghe à toca partir, sensa tante istrussion e co’ un s-ciop che féa pietà.
- “I à ciamà ’l novantanove che pissa ’ncora in leto” - cussì me contéa me nona.
- Secondo ti, éò de jùst che i nostri fioi sàpia che sul Montèl l’è stà fusià mièri de soldài come disertori, tirài fora par decimassion?
- … ’A verità l’è meio che i vegne saverla da so’ pare e so’ mare, pitost che ghe ’a conte qualchedun che à altri intaressi… Ricordate Toni che ’a storia la è stada scrita dai siori, l’è par quel che i poreti dovéa restar ignoranti.
- Àa saeùte Bepi!