Se vota ànca sr'ano che vien
Fameja Alpina > Toni e Bepi
Toni e Bepi
di Isidoro Perin
Se vota ànca st’ano che vien!
- Ciao Toni! Bevetu un’onbra?
- Bepi, va pian che st’ano el vin l’è poc!
- Co ghe n’è che basta par far l’Adunata de st’ano che vien vol dir che ’a va ’ncora benon!
- Te sa, Bepi, che in primavera de st’ano che vien se va votar?
- Altrochè! L’è ’na vita che ’i se ’a tira: - Bisogna star tuti insieme par poder bàter ’a sinistra!
- Chealtri invesse: - No bisogna spacàrse, si no quei de destra ’i me bate!
- E in mèso ghe sen noaltri che cussì i me bate quei de destra e quei de sinistra.
- 'I à tuti problemi de democrassia!
- Infati no ’i boni de spartirse ’e careghe.
- Ma spèta co’ ’i à ciapà quèe nove, se ’i moèa pi’.
- Bisogna pensare ai giovani! - I dise, e intanto no ’i se move da là gnanca se te brusi curame!
- ’I è cussi veci che ghe toca cior el Viagra par far ’e scàe.
- Parché? Cossa c’entra el Viagra coe scàe?
- Parché ’i è cussì veci che non ’i ghe ’a fa pì a tirar su gnanca i xenòci!
- E dopo ghe n’è quei che te ’i buta fora dàa porta e ’i te vien dentro dàa finestra.
- Adess che ’e banche me à ciavà i s-chei ’i dise che bisogna far calcossa par quei che à sparagnà e ’i è restai fregai.
- Se fusse vero ’i varìe mess in gaèra qualche banchier e invesse ’i è tuti là pronti a fregarme n’altra volta, tanto lori no ris-cia gnent parché i s-chei ’i è nostri.
- Bepi! Credeme a mi, ’a pension la è poca, ma l’è meio magnarla driomàn!
- Te à rasòn Toni! Ànca parchè se ’i s-chei ’i me ’i magna lori no me ne resta pì gnanca par qualche onbreta.
- Àea saeute Bepi!