Schersa coi fanti...
Fameja Alpina > Toni e Bepi
Toni e Bepi
di Isidoro Perin
Schersa coi fanti...
- Ciao Toni, bévetu un’onbra?
- Ànca un rosè, che ’l va tant de moda.
- Te dirò, de gusto no ’l canbia tant, ma oncuò va de moda el coeòr: se beve ànca coi oci!
- Co’ i òci? Varda de vardar drit, davanti, come co’ se ièra reclute, che no se podéa vardar né a destra né a sinistra, parché si no te ris-cia che a vae finir mal!
- Co’ se ièra cèi ghe ièra pochet da magnar, e là sì che se magnéa coi òci: ades che ghe n’è ànca massa me toca tirar ’a cinghia pal colesteroeo. Me à restà i òci, ma no se pol vardar, parché l’è deventà un reato vardàr ’e robe bèe, e po’, par dirla tuta, co’ i ani, me se à scurtà ànca ’a vista!
- Canbien discorso. Ti Bepi, se fa pecà pregar i santi perché ’i me iùte a vinser, par esempio, ’magari ’na partìa ae carte?
- Te me fa pensar, parché ultimamente su ’na scuoea elementare de Salerno el maestro l’à ciamà in classe el capo ultrà dea Salernitana e ’l ghe ha fat recitar ’na “Ave Maria” storpiada aposta parché ’a so’ squadra vinsesse contro el Venessia e à restesse in seria “A”.
- Va eà! No sta dirme che ’i à vinto!
- Sì Toni! Par do a uno! E tuti i genitori dei tosatèi ’i à ringrassià el maestro parché cussi l’à usà ’na maniera moderna de insegnamento “socializzante”!
- Sen ciapài ben! Me nono me diséa: “Schersa coi fanti ma làssa star i Santi!” E me nono ’l iera un contadin.
- Noaltri contadini se véa ’a fortuna de ver i noni in casa e se iera tirai su a late e pestarèi, che, par chi che no sa, vol dir late e puenta moesìna.
- Ciò, ma adess no se pol pi’ darghe “latte vaccino” ai tosatei, ansi ghe n’è chi che se pol dàrgheo, ma slongà co’ l’aqua, chi che bisogna darghene poc, e chi che proprio no!
- Uno par sort, come pal Covid e pai vaccini: quei de destra no, quei de sinistra sì, quei de centro no se sa!
- E par quei che à pers ’a tramontana vorìa ànca dirghe che de late bon no l’è mai mort nessun!
- E gnanca par un bon goto de proseco Toni!
- Aea saeute Bepi!