Problemi de Governo
Fameja Alpina > Toni e Bepi
Toni e Bepi
di Isidoro Perin
Problemi de governo
- Ciao Bepi. Bevetu un’ombra?
- Te me fa vegnér vòia, ma speta che varde su’ ’a nota in scarsèa… Uncuò ghe n’ò bevù una sòea, e ora posse.
- Te à rason tegner el conto prima che te toche calcossa, bisogna che inpare farlo ànca mi.
- Qua ormai bisogna tegner conto de tut: el bol dea machina, el “bollino blu”, ’e boéte che scade, l’assicurassion...
- ’E tasse déa scuoea dei tosati (col versamento volontario che bisogna farlo far forsa), e boéte de l’aqua, déa luce, del gas, dée scoàsse, ’a tassa déa teévision, el 730 e tute chealtre spese foravìa.
- Àa fine co’ cossa màgnetu.
- El ministro Tremonti però l’à dita che no l’à mai mess e man sue scarsée dei Taliani.
- No no! El me à cavà e braghe diretamente!
- Pensa che rassa de scherso che ’l me à fat a noaltri, ma ànca a tute ’e associassion che fa voeontariato: prima el me à aumentà ’e tarìfe dea spedission del giornal da un dì a chealtro e adess el vol portarme via quasi tut el 5 x mille.
- Ghe serve s-chèi Toni, ’na volta parchè vien el teremoto, ’na volta parchè piove massa, ’na volta parchè a Nàpui ghe n’è ’e scoasse.
- Pai nostri omeni de governo no ghe n’è mai un fià de pase.
- ’I è ànca bravi a riussìr a trovar el tenp par far qualche festa tra de lori co’ tut quel che ’i à da far.
- Magari no i se fa mancar gnent…
- Fermate là, no sta ’ndar massa vanti.
- Va ben. Va ben. L’è che mi vée senpre credù che ’a Escort fusse ’na machina…
- Cambia discorso Toni. Te àeo rivà el digitàe?
- Si Bepi. Sì!... Ma adess su ’a me teevision vede metà scrite o metà teevision.
- N’altra fregatura. ’I à fat aposta parchè te te stufe e te vae conprarte ’na teevision nova.
- Co’ ’i fa calcossa de bon, no i ’o fa mai pai poreti, lo diséa senpre me nona!
- Ma no stem lagnarse senpre. Ànca se no te varda ’a teevision te pol magnar istesso.
- E te digerisse anca meio senza tute ’e bae che i te conta.
- E sul 2011 (domieundese) cossa vegnarà?
- Te vedarà che se va votar da novo.
- No prima che ’i àbia fat i tre ani da deputati però, cussì no i me risolve i nostri problemi, ma i sòi sì.
- Parchè?
- Pension assicurata Toni! No ’i è mia mone come noaltri che me vol 40 ani de lavoro par ver un fià de pension!
- Àa saeute Bepi! Bon ano a ti e a tuti i Alpini!