Pori Sindaci!
Fameja Alpina > Toni e Bepi
Toni e Bepi
di Isidoro Perin
Pori Sindaci!
- Bepi fermate! Ghe n’è un’onbra che te speta.
- Ciao Toni. Sen senpre de pressa.
- Ciòtea comoda Bepi che ’a pension te dura de pi’!
- Atu vist Toni, a Treviso ghe n’è ’e banchine nove a San Leonardo.
- E ti magari te ’è a provàe se le è comode.
- Par podàr ’a schena bisogna che te fae ’l morto… Però all’assessor ’e ghe piase da morir!
- … Pensar che ’i à vu coràio de criticar ’l monumento dei Alpini!
- Vui veder ’l sindaco se l’à coraio de sentarse sora ste casse da mort col deventa vecio!
- A proposito del sindaco, atu vist quel de Venessia che nol à paura dée nave che passa davanti piassa San Marco, no! No!.. ma dée fotografie che ’i ghe à fat!
- Se l’è par quel l’à paura ànca dée storiée che se ghe lese ai tosatei.
- Sta ssito Bepi parchè qua te va sul gender, che tuti ’i o nomina e nessuni sa cossa che l’é
- L’è senpre pì difissie far el sindaco.
- Varda quel de Roma, par esempio, che ghe à tocà meterghe un badante parchè nol se perde.
- Anca parché l’è senpre de strassinon ostrega.
- Lu ghe core drìo al Papa e ’l Papa lo para via come che se fa col can in césa.
- Chissà come che ’i farà col Giubilèo che ghe manca poc pa rivàr.
- Mi vorìa dirghe al Papa che ’l ghe dae ’na benedission dopia ai nostri sindaci parché i pì tanti ’i sta passando un brut periodo ànca colpa dea crisi.
- E magari dato che ghe sen, mi ghe diràe ànca a Rensi de darghe qualche s-chèo in pì, che ’e strade le è ciapàe senpre peso e i servissi ’i è senpre manco.
- Bepi! Incontete dea saeùte che la è l’unica roba che se à bisogno.
- Me à tegne da cont ostrega, no fusse altro che par farghe rabia al governo che cussì ghe toca darme ’a pension!
- Parla pian, che no ’i te sente, si no ’a prima volta che te à bisogno de ’na tac i te assa morir.
- Te à rason Toni! Aa saeute!