Piova d’istà beati chi ghe n’à!
Fameja Alpina > Toni e Bepi
Toni e Bepi
di Isidoro Perin
Piova d’istà beati chi ghe n’à!
- Ciao Bepi! Bevetu n’onbra?
- Meio profitar, parché co’ sta soeagna sparisse ànca quea!
- Te si senpre drìo lagnarte: sarà ànca gran caldo, ma almanco fin dess no à mancà l’aqua.
- L’è inùtie sparagnarla se co’ piove vien ’so el diluvio!
- Co’ no vien tenpesta e ànca grossa!
- Se dise che quel Dio manda no l’è mai massa.
- Stavolta Bepi me par che l’à esagerà coe misure.
- Te dirò Toni, sti ultimi ani se ven un fià pers drio a teevision, i teefonin.
- Invesse dee rogassion se s’indendenocia davanti al meteo…
- E ognun l’ha el sòo, che l’è meio del tòo!
- Co’ se se alsa àea matina no se fa pì el segno dea crose, se verse ’e “chat”, che pi’ che na paroea ’l me par el verso del quaiòt!
- E tuti a meter “mi piace” ànca se l’è mort so ’sio.
- Ciò Bepi, come fatu ti a sceglier ’e piantine da meter sul’ort?
- Bea domanda! Adess ghe n’è vinti tipi de piantine de pumidori, zai, neri, a cuor di bue, cirio, e dopo un sac de tipi che no te sa gnanca cossa farghene.
- Ma Bepi, te lesi ’e istrussion come che te fa par tute ’e robe che te ordina.
- Ciò Toni, vorissetu dir che pin pian me rivarà ’e piantine smontae da far su come che se féa col meccano?
- El meccano! Che tenpi Bepi! Adess se te ghe ne trovi ’i ghe ciama “materiale vintage” e ’i te ’o fa pagar un òcio dea testa.
- Pena finì ’a guera no i vedéa ora de butar via ’a roba vecia, ànca parché ’a ghe féa vegnér in ment bruti ricordi.
- Ghe ièra pì bisogno de desmentegar che de ricordar.
- Ghe à vussù el so tenp per poder mandar ’zo tute e disgrassie che a ’zente à passà co’ ’e guere e col fasismo.
- E adess invesse ’ndén in serca, ànca par poder farghéé veder ai nostri fioi e ai nostri nevodi.
- Anca parchè tanti de noaltri alpini sen ’za noni da un toc.
- Satu Bepi, no pensèè che fusse cussì bel far i noni.
- Toni! Se deventa veci! Aea saeute!
- Aea saeute Bepi! I ani i é come i s-chei: no i conta gnent, ma i pesa!