Milàn l'é un gran Milàn
Fameja Alpina > Toni e Bepi
Toni e Bepi
di Isidoro Perin
Milàn l’è un gran Milàn
- Ciao Bepi, bevetu un’onbra?
- Mèio de nero!
- Parché??
- Parchè el proseco de Miàn me sta ’ncora sul stomego.
- Ahh! Te sì ndat véder ’a premiassion de “Parole attorno al Fuoco”!
- Sì Toni! Sen partìi da Arcade co’ tre corière.
- Ciò! E come ’ea ’ndata?
- Bèa ’a sàea dea premiassion, bel el coro, bèe ’e storie dei premiài, bel el rinfresco, ma, se no ièra par noaltri ’i sarìa stai quatro gati!
- E Miàn éo pronto par l’Adunata?
- No èo so, e pense che no ’i sàpia gnanca lori; ven fat un giro in centro e ’i me vardéa come se se fusse alieni. Qualchedun però me saeudéa, ànca co’ creansa.
- E i bar? Te sa che par noaltri ’a ostaria la è la roba pi’ importante.
- Se ven fermà su un bar e ò bevù un proseco: costo sinque euro!
- Par mi no ’i ve à ciapà par alpini ànca se vei el capèl co’ ’a penna!
- Te à rasòn : mi pense che ’i me à ciapà par quei del capèl de paia!
- Ah ben po’, se ’i pensa de fregarme ’i se sbaglia: se no ’i cambia idea el vin se ’o portén da casa, sue spae, come in montagna!
- Spere che ’i cambie testa parché Miàn se merita ’na Adunata come Dio comanda.
- A proposito de novità, atu savù che ven ’a nova diretrice par Fameja Alpina?
- E Piero?
- No sta ver paura, l’è sempre dei nostri, pensa che co che l’è deventà diretor de Fameja Alpina el véa ’a stessa età che la ha adess ’a Sara.
- Cussì ’a se ciama Sara. E quanti ani àea?
- Ma no te te vergogni? No se dise i ani de ’na femena!
- …Ànca se la è alpina?
- La è ’sovena e la à dita che ghe piase ’a conpagnia e un bon goto de vin! No te basta!
- Va ben! Va ben! No sta rabiarte.
- Aea saeute Bepi! ’Aa nostra e quea dea Sara!
- Che bel! Poder bever un’ombra àea saeute de ’na Alpina!
- E pensar che co se à fat ’a naja, chi varìa mai pensà che se podéa bevér un’onbra co’ un’Alpina che fa el diretor del nostro giornal!