Mejo 'l Papa che i politici
Fameja Alpina > Toni e Bepi
Toni e Bepi
di Isidoro Perin
Mejo ’l papa che i poitici
- Ciao Toni! ’Scolta ’sto bianco!
- Ciao Bepi. El bianco canta ben, ma in giro non ghe n’è tanta voia de cantar!
- No ’i fa altro che dir che i ’sòveni i disocupài.
- In Italia ven pers milioni de posti de lavoro, ma ’e careghe dei poìtici le è tute al so posto e no ’i se fa mancar gnanca ’na vìrgoea.
- No te à sentì che ’i à serà da vinti ani ‘’a Cassa del Mesogiorno.
- Ma ’l liquidatòr l’è ancora là, pagà coi nostri s-chei.
- Intanto che ’a ’sente more da fame, lori ’i se à spartì i s-chei del contributo ai partiti.
- Ignorante! Adess el se ciama rinborso elettoràe.
- Ciàmeo come che te vol, ’i è senpre s-chei nostri.
- Toni! ’I ièra s-chei nostri!
- Canbien discorso, si no me ràbbie! Cossa ditu ti del papa novo?
- Altro che novo, e ghe piase cantar… El ghe è canta a tuti: poitici, vescovi, preti furbi e ànca a noaltri che el pì dée volte sen “cristiani” par modo de dir.
- Però el sa dar l’esenpio par primo: via ’e scarpe de raso, ’a crose de oro, i vestiti de lusso…
- Nol’à tenp da perder, no ’l va in ferie, nol dorme gnanca su l’apartamento del Papa.
- Lu el sta ben coi poreti. Basta che te varde i so’ parent e ’a tera dove che l’è nassù so’ pare e te capisse suìto de che pasta che l’è fat.
- Me piase proprio come chee ’l ragiona e me piase pensar che noaltri alpini se ghe soméia ’na s-cianta.
- Pian Bepi! No sta montarte a testa!
- Nessun pol pensar de ’ndar da lu e tornar casa come se non fusse secess gnent.
- Par mi l’è un che podarìa scuminsiar a canbiar el mondo sul serio.
- Speren che i poitici ’i ’o scolte e che i vescovi ’i ’o asse lavorar.
- Mi ghe ’o augure, ànca pai nostri fioi. Àea saeùte Toni!