Me basta lavorar
Fameja Alpina > Toni e Bepi
Toni e Bepi
di Isidoro Perin
Me basta lavorar…
- Ciao Bepi!
- Un’ombra, grassie!... Ma che ’l sia nero!
- Par restar in tinta?
- Te pénsetu che in Italia, ’e tre persone pì siore, ’e à pì s-chèi de tre milioni de poreti!
- Parchè i siòri ’i sa come far i s-chèi.
- I poreti, invesse ghe basta lavorar par mantegner a fameja onestamente.
- El governo no ’l capisse che a noaltri veneti, se me manca ’l lavoro, sem morti!
- Ai poìtici invesse ghe basta che no ghe manche i s-chèi par lori,… pal lavoro no ’i se copa de sicuro! Àtu mai vist un poìtico che ’l va picarse parchè no l’è bon de farghe fronte ai so’ inpegni?
- No!
- E gnanca no te ’o vedarà, Toni!
- Me fiol l’à ’sa scelt: el va lavorar in Australia.
- Ma se ’i dise che “tuto el mondo l’è Paese”!
- Ehh!... “Fora che Istrana!”… Bepi… che la è péna pi’n là.
- I nostri fioi ghe toca ’ndar via dal’Italia parchè i quatro veci che me comanda ’i me à magnà i s-chèi e ’i me à assà i proverbi, e tante volte gnanca pì quei!
- Come se pol far noaltri Alpini a far funsionar mèjo ’e robe?
- No podén tradìr ’a nostra ’sente. L’è proprio ’dess che dovén star al nostro posto, par iutàr i nostri fiòi, per mostrarghe àa ’sente che se pol viver da persone oneste!
- Però se resta poréti.
- Cossa ghe’n fàtu dei s-chèi robài, che co’ te ’i toca te te sente ’e man onte e sporche.
- A qualchedùn però, no ghe fa schifo!
- Sì!... Me piasarìe savér co’ che coràio che ’i varda sui oci i so’ fiòi, e i fiòi de so’ fiòi.
- L’è vero che i fiòi no sa gnent, ma se ghe n’è un Padreterno me augure che, sibén che l’à tanti ani, ’l ghe vede ’bastansa, e che ’l mete via i scontrìn!
- Prima o dopo ’i ’ndarà ben a far i conti da San Piero!
- No ’i pensarà mia de cavàrsea co’ un pachét de cafè e ’na barseéta?!
- Àa saeùte Toni!