Massa influenser
Fameja Alpina > Toni e Bepi
Toni e Bepi
di Isidoro Perin
Massa Influenser
- Ciao Toni, bevetu un’ombra?
- Bisogna che ghe domande al dotor se posse!
- Ah, ben po’! Lu el pensa ài to maeàni, ti pensa aea to saeùte!
- No te à sentì che al Presidente “Jo Baiden” ’i ghe contròea ogni mese che no’l sia fora de testa.
- Secondo mi ’i fa ben, co ’sti ciàri de luna, meio no fidarse.
- Me par che ghe n’è massa zhent che ’a va su de giri: i è senpre rabiài, i fa barufa co’ tuti, i copa e i se copa…
- Me diséa me pàre che un bon e un trist i pol ’ndar d’acordo, ma do tristi no! - L’è che, co’ i siori fa barufa, i tosatèi e i poreti more.
- Adess ’e bonbe le è inteigénti, i è i omeni che i è restài ignoranti!
- Tuti vol dir ’a soa! Ghe n’è i social dove che te pol far finta de esser un professor. - Varda che se dise TUTTOLOGO!
- Infati: l’inteigente tase, el mona sa tuto!
- Adess par savér cusinar basta che te vardi ’a teévision.
- I è tuti masterscef!
- Sinquant’ani fa ’e tose che se sposéa no è savéa cusinar un bel gnent.
- Par forsa. Co’ ’e véa quatordese ani ’e ’ndéa lavorar in fabrica e co’ ’e tornéa casa so’ mare che parecéa da magnar.
- Me ricorde de do siore che ’e féa comarò tra de ore:
- Ciò comare, ti che te sa, ’a Nina, che ’a se marida sabo passà, saea far da magnar?
- No Bepi, però ’a se à conprà un libro de cusina, te vedesse che roba!
- Adess ’i è tuti bravi far da magnar: ’i à inparà tuti da so’ nona che ’a féa ’a pasta a man, el pan in casa, ’a formaièa de casada, ’a carbonara col “guanciale”…
- Ma quando ’i ò féa? Co sinque fiòi da slevar, ’e bestie da varnàr, l’on sul canp da darghe ’na man… Me vien da rider!
- ’I ghe ciàma “Influenser”, a mi me par che i conte bàe.
- Però ’i sa contarle, che la è quéa ’a bravura pì granda!
- ’Na volta se diséa che ’l faegname co a còea e ’l stuco inorba el baùco.
- Bepi adess ’i à canbià l’atresso, ’i usa ’a teévision, el teéfonin, ma el scopo l’è senpre el stesso: far sc-hei sensa fadiga sua pèe de tuti quei che ghe casca.
- Purtropo i poreti che casca par primi. Aea saeute Toni!
- Aea saute Bepi!