L'Adunata? Co' calma!

Fameja Alpina > Toni e Bepi

Toni e Bepi

di Isidoro Perin

L’Adunata? Co’ calma!

Ciao Toni! Bevetu un’ombra?
Grassie Bepi, ma co’ sto caldo l’è meio un spriss.
A mi sto sofegàss me fa vegnér ’l mal de testa.
Invesse i nostri poitici va fora de testa!
Àtu vist ’a Grecia? ’A vol ’ndar fora da l’euro.
Prima ’i à falsificà i biànci, dopo ’i à ciapà i s-chei, e adess ’i ghe’n vol ancora.
Piàn! Varda che i s-chei no ’i à ciapài ’a pora zente ma ’e banche.
Come da noantri po’!
E po’ co te va in préstio i s-chei bisogna tornarli indrìo!
A casa méa se féa cussì ’na volta, ma adess va de moda difarente.
Chissà parché tanti poìtici nostrani ghe dà rason!
Crédeme Bepi, le è robe massa grande par noantri, mèio assar perder!
Te à vist l’Adunata a L’Aquila: a mi me vegnéa da piànder.
Dopo sie ani! Va ben far poc, ma gnent l’è massa poc.
Come se fa far morir ’na cità in te sta maniera.
Adess me rende conto che ven fat ben far l’Adunata là: cussì tuta l’Italia à vist e speren che qualchedun se vergogne!
Senti Toni parlén de calcossa de mèio si no me vièn el magòn.
Ti Bepi, pensetu che i me dàe l’Adunata nel domìediisete?
Bisogna senpre spetàr ’e decision dei Grandi Capi, però dopo vér mess insieme i tre Grupi de Treviso e ’e quatro sesiòn (Coneiàn, Treviso, Valdobiadene e Vitorio) pense se posse vardarse sui oci sensa paura, come che ’i à senpre fat i Alpini e no da uncuò!
Dopo sarà quel che sarà, ma par mi la è pi’ de ’na speransa.
Ò ’na vòia de mostraghe a tuti che noantri Alpini no se à mai vussù far ’a guera, sen stai mandài in guera e se ven senpre conportà da òmeni!
Par quel che tuti me vol ben dapartut.
Se fusse par noantri l’unica guera che se farìe la è quéa contro i ladri e i fiìbustieri.
E contro ’e disgrassie, aluvion e terremoti conpresi.
E dopo se cioén ànca ’a libertà de qualche pecà…
Magari un’onbra, ma senpre cantando in conpagnea: parchè da sòi el vin fa mal!
Àea saeùte Toni! Se vedèn dopo ’e ferie, senpre che qualchedun no àbia bisogno prima.

Stampa