I tempi cambia
Fameja Alpina > Toni e Bepi
Toni e Bepi
di Isidoro Perin
I tempi canbia
- Ehi! Toni! Fermate!
- Go’ pressa.
- Da quando in qua se passa davanti ’a ostaria senza vardar dentro! L’è come passar davanti ’a cesa sensa segnarse!
- Varda che go’ pressa.
- Cosa gatu ostrega! El (1)rebegol sul cueo!?
- Go da netar ’a casa, far l’ort e pareciar da magnar.
- Netar ’a casa? Ma ’a femena cosa faea.
- ’A va lavorar Bepi. Te sa che par pagar ’l mutuo bisogna lavorar in do’, ànca parchè co’ l’euro ’a paga la è deventada pi’ curta e ’a dimagrise in continuassion…E po’ bisogna ànca iutar i nostri fioi. Prima bisognea farli studiar parché si no i restéa disocupai e adess che i ’a studià no ’i trova lavoro.
- Ma va eà, te si senpre drio brontoear. Ghe vol pasiensa! Bevi qua! Che st’ano el vin l’è ’ncora meio dell’ano passà, e co’ ’a neve che ghe n’è in montagna no mancarà gnanca l’aqua, siben che ai alpini gh’intaresse un fià manco.
- Saeute!… Mi invesse go paura che manche el petrolio: i arabi no i me convinse, e l’Iraq el bòie come ’na pignatta de fasioi.
- Se vede che là manca i alpini!
- Ma cossa ditu po’! Varda che Fabrisio Quattrocchi l’ha fat ’a naia dei alpini.
- Poro fiol!… Però bisogna dir che l’ha vu’ coraio.
- Assa perder. No ghe n’è gnent da vantarse. Pensa che sul secoeo pena passà l’è mort, causa dee guerre, sentosessantasettemilioni (167.000.000) de persone.
- E no me par che ’sto novo millennio el sia partì mèio! Ansi!
- Bastarìa poder scuminsiar ’ndar d’acordo col vissin de casa, col fradel, coi parent…
- Lassa perder i parent che i è come e scarpe: pì che i è streti e pì i fa mal!
- Vitu mo’! come votu far a ’ndar d’acordo coi arabi se no semo boni de capirse gnanca tra de noaltri. Pensa che ’na maestra me disea che ànca i tosatei a scuoea i fa fadiga a zogar insieme: no i se soporta, i ’se barufanti, e ’i se ofende ànca par gnent …
- Parchè ti no te ga mai sentì serte mame! MariaVergine le è come ‘l diavol.
- Assa perder: no te sa che “tre femene e un pignat, e ’l marcà l’è fat”.
- Te ga rason. Varden almanco de no farlo ànca noaltri, ànca parché sen sol che in do’!
- Ciao Bepi. Vae parchè el sol me magna e ore, e po’, coe ciacoe no se guadagna!
Glossario:
(1)rebegol: agitazione.