I nostri fìoi
Fameja Alpina > Toni e Bepi
Toni e Bepi
di Isidoro Perin
I nostri fiòi
- Ciao Toni! Bevetu un’ombra!
- Ma parchè te parla cussì pian?
- No te sinti che siénsio, no par gnanca de esser in ostarìa.
- Ma cossa éo sucess? Éo mort qualchedun?
- No Bepi, no ghe ne pì partìe del baeòn! El campionato l’è finì.
- Ostrega ciò! Adess che l’è passà ànca ’e votassion non ghe n’è pì gnent da dir!
- Ànca co’ ’ femene me par che qualchedun se ha chietà.
- Se vede che ’l à finì el “viagra” o i s-chèi!
- Te dirò che co’ ’sti ciari de luna bisogna sparagnar ànca el fià se te vol rivàr a fine mese.
- E ancora che qualche sodisfassion, almanco noaltri Alpini, se pol cavàrsea; te à vist a Torino che rassa de Adunata!
- E come al sòito ’a “Rai 3” à me fat un servissio da lecarse i déi.
- E noaltri qua a Treviso bisogna far festa pài novant’ani déa Session!
- Novant’ani… me pense de quei che suìto dopo ’a guera i à vu coraio de trovarse, prima de tut par iutàr ’e vedove e i orfani de guera, e dopo par onorar i morti.
- E no ’i fat gnanca ora de scuminsiàr a respirar che i se à trovà in guèra n’altra volta.
- Ma ànca i Alpini iscriti al’ANA dopo a seconda guera mondiàe i à savù mantegner ben ’a strada dei Veci.
- Da adess in avanti però ’a sarà pi’ dura. Bepi!... Alpini ghe n’è senpre manco.
- Ma te à vist quei che à fat ’a mininaia che passion che i ghe mete! E no i mòea ’l capèl gnanca se te i còpi!
- Bisogna starghe drìo, scoltarli e darghe spassio!
- Anca ’e scuòe ’e s’intaressa àe storie dei nostri Alpini e ai nostri fioi ghe piase scoltar e capir!
- Però dée volte sen noaltri che no savén trasmeter ’a nostra storia: ’a scuòea i gh’insegna de Garibaldi, de Cavour, del Re Vittorio Emanuele, ma se te ghe domanda a ’sti fiòi se so’ bisnono l’à fat à guera, dove, e quando, tante volte no i sa dìrteo.
- Parché su ‘ste case manca i noni che dovarìa ver el tenp par contarghe déa guera, déa vita de ’na volta, insegnarghe i ’soghi de ’na volta, insegnarghe a sparagnar…
- Parché bisogna sparagnar co’ ghe n’è, par poder vérghene co’ vien carestìa! E questo i Noni e i Alpini i ’o sa fin massa ben!... Vero Bepii?
- Àa saeùte Toni!