El futuro l'é un fià scuro
Fameja Alpina > Toni e Bepi
Toni e Bepi
di Isidoro Perin
El futuro l’è (1)un fià scuro!
- Ciao Toni! Bevetu un’onbra?
- Stavolta paghe mi!
- Saeùte! Ma dove vatu in giro co ’a pila?
- No te à sentì che basta che casche un pin in Svissera par restar sensa luce meza zornada.
- No sta dirme che te à paura! No te te ricorda pì el canpo estivo su al rifugio Berti che ghe ièra un scuro che no se ghe vedea gnanca a bestemar.
- Se me ricorde! Ma adess a me paura la è che no ’i me vede co’ vae a piè pa ’a strada. Va a finir che i me stira come un per de braghesse.
- A mi me sa che l’è stat un truco par inventar aumenti novi. ’Na volta i me diséa che i conprea a corente all’estero par sparagnar, adess i me dise che bisogna far ’e centrai parchè fora ’a costa massa.
- Come se no bastasse ’a fregatura de l’euro. Tut che aumenta e l’inflassion che caea. Come che i fae a far i conti no se ’o capisse, però intanto ’i me frega.
- Toni assem perder, si no se rovinen ’l stomego e me toca far de manco ànca de un’onbreta. Pensa pitost a chei pori fioi morti a Nassirya.
- Te ga rason. Ma quel che me à fat rabiar l’è stada ’a teevision. La è ’ndada ’vanti tuta ’na zornada a parlar senpre dei Carabinieri, come se chealtri fusse stai là in gita e i fusse morti par sbaglio. Par carità, mi no go gnent contro i Carabinieri, ansi me à fat ’na pena granda cussì, ma, ostrega, e chealtri? Ei fioi de chi?
- Mi go pensà ai nostri alpini in Agfhanistan e a tuti quei che i è fora pal mondo. ’I ghe ciama “Forze di Pace”, ma me par che Panariello l’à dita ben un sabo de sera: - ’Na volta i partìa pàa guerra e i tornéa in pase; adess i parte par far ’a pase e i torna in guera!
- Bepi, ti che te si senpre otimista cossa pensetu par l’ano novo.
- Satu che, secondo mi, se fen un fià massa paura tra de noaltri. Pensa che l’ultima guera la è finìa sinquantaoto ani fa e che in Italia non ghe n’è mai stat un periodo cussi longo sensa guere.
- Appunto par quel! Mi ò ’na fifa che prima o dopo qualchedun la inpiante.
- L’altra sera son ’ndà trovar i méi che i è veci ormai e i se move poc. I passa ’l tenp a vardar a teevision e co’ sucede tragedie tutti i canai no i fa altro che trasmeter e ultime notissie che aea fin le è senpre quee. Ò trovà me pare tut (2)spasemà, me mare col rosario in man che ’a piandea come ’na scuriada. Me à tocà sigarghe: vardè che i morti i è senpre disnove, ànca se i teegiornai i ’o dise sinquanta volte!
Glossario:
(1)un fià: un po’ - (2)spasemà: spaventato.