E nostre femene...

Fameja Alpina > Toni e Bepi

Toni e Bepi

di Isidoro Perin

'E nostre femene!

Ciao Bepi! Un proséco?
Uncuò me va el rosè!
Cossa te à sucess stamatina? Te à senpre bevù bianco o nero!
Ma uncuò la è ’a feste dée femene: voée far un evviva par lore.
Bravo, bea idea, ma par lore ghe vol altro: le è senpre stae dadrìo come ’e rode del caro, usàe e maltrattàe!
Pensar che me nona diséa che ’na casa la è tegnùa su sui quatro cantoni: uno lo tien su l’om e chealtri tre ié tegnùi su dàa femena.
Pensar che co’ me ò sposà mi, sui ani setanta, el prete diséa: - “la moglie sia sottomessa al marito!”
Gnanca i preti no féa gnent par salvar ’e femene dae bote e dae umiliassion.
Adess ’e robe se à quasi revessà e i omeni i fa fadiga canbiar el modo de pensar e de adatarse ae nove règoe.
Qualchedun va via de testa, el pensa che ’a femena sia ’na so proprietà, e cussì se qualcossa no ghe piase el deventa ’na bestia vioenta e sassina.
E pensar, cossa che se farìe noaltri alpini sensa ’a nostra muiere che me soporta?
Bisogna però star atenti de non darghe a nessun el dirito de pensar mal de noaltri, ànca quando che sen un fià ciochi bisogna senpre star al nostro posto.
E se vedèn qualchedun che non se comporta ben doven iutarlo a capir!
Adess l’ANA Nassionae l’à fat un sito aposta intitoeà: #controlemolestie, e là se trova el “Manuale di consapevolezza”,
No ghe n’è pì scuse! Doven leserlo tuti e star ben atenti ànca parché l’è inutie regaearghe mimose ’na volta l’anno ae nostre femene e dopo mancarghe de rispeto par tut el resto dell’anno.
Se tuti noaltri alpini se comporten da “Omeni” te vedarà che tanti altri me vien drìo, ànca parché i Alpini ’i è senpre un pass davanti.
Par questo ven ’na granda responsabìità: ’a ’sente me varda, i fioi ’i me vien drìo e no se pol tradir ’e nostre femene.
E me pense su certi stati dove che ’e femene le è sensa diritti, e vien maltratàe, copàe… Se sen bravi speren ’i me copie.
Aea saeute Bepi!
Ciò Tonii! No pensée che ’l rosè el fusse cussì bon: aea saeute de tute ’e femene!