Che rassa de inverno!
Fameja Alpina > Toni e Bepi
Toni e Bepi
di Isidoro Perin
Che rassa de inverno!
- Ciao Toni! Bevetu un’onbra?
- Dove situ sta’ tut sto’ tenp?
- Son restà, ansi sen restài sensa “Fameja” ostrega.
- Varda che a mi, no me ha gnancora scanpà a femena: ò ancora ’a Fameja!
- Ma cossa ’atu capì, mi parlée del giornal: “Fameja Alpina”.
- Co’ ghe n’è crisi de s-chéi noaltri me toca taser e portar pasiensa, ma co’ poden dir ’a nostra!...
- Ricordate che semo ’na associasion apartitica.
- Ghe’n posse mi se ’e tasse le é aumentae come ’e tenperature? In montagna ghe n’è tanta neve come s-chei sue me’ scarsée!
- Te gà rason! Un inverno cussì no l’ò mai vist.
- Ghe n’è’l sanbugo coi but e ’e vide che piande.
- E i ciama ànca tenporai!
- Bruta roba Bepi! –(1)“Ton de zenaro, de tre vache te ghe’n perde un paro!”
- Ghe manca sol che quea! Te sa che ièri not i è vegnùi robar.
- Ànca da ti!? Da quando che l’è vegnù fora l’indulto i gà moeà massa tanti ladri.
- E i è tornai a far el so mestier ostrega!
- Ma adess i nostri poitici i se ga messo a far e ronde de note: Zaia davanti, e dadrìo quei che ghe tende a lù!
- I se tende tra de ’ori insoma.
- Come noaltri coe ronde soto naia! Me ricorde che a Beun no se savea come scanparghe.
- Tra quea del setimo e ’a nostra dea Fantussi ièra tuta ’na guera: quei del setimo me freghéa noaltri e i nostri féa conpagno co’ i soi, in pì i se tendéa tra de lori.
- Peso de Zaia e i so amissi.
- Però ièra bel ’ndar de ronda: tuti tre al passo tirài e lustrài, coe giberne, el sinturon, ’a baionetta, ’e ghette e i Scarpon…
- …Bareta da stupido!
- Però ’e tose ’e féa finta de gnent e intanto ’e tiréa l’ocio.
- Par forsa mona! ’E savea che in tre no te podéa far gnent, ànca parchè ghe ièra n’altra ronda che ghe tendéa aea ronda!
- Se ièra furbi come un gat de pionbo! Saeute Toni!
- Bepi, che bei che i ièra i nostri vinti ani!
Glossario:
(1)“Ton de zenaro, de tre vache te ghe’n perde un paro.: tuoni di gennaio di tre vacche ne perdi un paio.