Alpini mondiai
Fameja Alpina > Toni e Bepi
Toni e Bepi
di Isidoro Perin
Alpini mondiai
- Bepi! (1)Gàtu visto ’a partìa dell’Italia co’ ’a Corea?
- Sì Toni! E ancora prima che ’a scuminsiasse (2)me ga vegnùo su ’l formaio dea sera prima.
- Parché?
- E te me ’o domandi ànca? Par cantar l’inno nasionae i ga dovùo ciamar ’na femena (brava, par carità), ma no i podèa cantarlo lori? Tanto me par che ultimamente, a furia de lustrarse come ’e signorine, ghe sia vegnù (3)parfin ’a vose bianca!…
- Sito Bepi! Ricordate che semo sul giornal. Fa un piassér, (4)àssa star a (5)praivasi.
- Toni, te ricordetu (6)co’ gavemo fato el canpo estivo sul Peralba?
- Se me ’o ricorde!?
- Me vien da rider. Te par de veder ’l capitano isterico che ciapa a (7)peae ’e boracce de aqua a domìe metri de altessa?
- El varissimo ciapà par mato, inpachettà e portà zo col tobòga.
- Me ricorde, invesse, de ’verli ciapài mi, i calci in cùeo, par ver perso el ’saino do pal buron. Piandée (8)come ’na scuriada parché dentro ghe iera i diesemie franchi che me mare me vea mandà da casa.
- No se vea el dirito de sbagliar e ancora manco de frignar. ’A partìa, invesse, la è stata tut un piagnistèo.
- Toni, ti te ga ànca rason, ma un arbitro cussì dove ’o trovetu?
- Gnanca se te ’o fa fabricar aposta, ’Na faccia cussì ’a te rovina parfin ’e barzeétte. Però no ’a ’se stada tuta colpa soa. El baeon ga da ’ndar in porta, no in casìn.
- A proposito de casìn, gatu visto che bel che ’l ièra Cannavaro col goldon in testa!
- No sta rider! Mi ghe gavarìa messo ànca ’a penna da alpin. In fin dei conti l’è sta l’unico che, zogando co’ sinque ponti in testa, el ga risposto da eroe ai coreani.
- Ai zogadori?
- No! No! Me riferisso ai studenti, quei che par protestar contro el ministro giapponese in visita àa Corea i se ga taià un (9)deo in piassa, i ga fato un pachetin e i ghe ’o ga regaeà.
- Se i me ’o vesse fato far a noaltri come prova de eroismo nei confronti dea patria cossa gavarissimo fato?
- Mi me gavarìa messo a sigar: - Tosati! Sté atenti parché el Capitano l’è da novo ’mbriago!
- Àa saeute Toni!
Glossario:
(1)Gatu: Hai; - (2)me ga vegnuo su: mi è risalito sull’esofago. – (3)parfin: persino; - (4)àssa: lascia; - (5)praivasi: privacy; - (6)co’ gavemo: quando abbiamo; - (7)peae: pedate; - (8)come ’na scuriada: come una donna frustata; - (9)deo: dito.