Alpini co' 'a patente
Fameja Alpina > Toni e Bepi
Toni e Bepi
di Isidoro Perin
Alpini co’ ’a patente
- Ciao Toni! Bevetu ’n’onbra?
- No sta’ ciòr in giro ’a ’sente che (1)uncuò no l’è zornada!
- No ocòre mia che te te ’rabi; te ò sol che domandà se te bevi ’nonbra!
- a ben, va ben! ’A beve istesso, ànca se uncuò i me ga ritirà ’a patente. Pensa che i me gà trovà che gaveo ’sero virgoea sie grami de alcool par litro de’ sangue. I me gà spiegà che basta do onbre magnando par ’ndar fora dei limiti de’ legge.
- Ànca par mi la é dura. Magnar sensa bever un per de onbre se fa fadiga ànca digerir. Pensar che i dotori dise che ’l vin fa ben…
- Adìo cafè corèto, adìo ombréte in conpagnia, aea sera, pena finì de lavorar, adìo feste dei alpini. Beati i furlani che i ga ’l coraio de ribelarse e domandar un’onbra in pi’.
- Pensa che mi voée far ’a naja dea Julia e invesse me ga tocà ’a Cadore. Noialtri veneti semo senpre stai bastonai pi’ dei cani.
- Crédeme Bepi, ’a nostra vita no sarà pi’ ’a stessa!
- Su! Su! No stemo desperarse. Bisogna vardar davanti. A proposito de vardar davanti te ga rivà casa el libreto sul novo codice dea strada che ga fato ’a Provincia?
- Si, ò go vist. Me ga piasso a tersa pagina col santin del Presidente Zaia in bici stanpa’ in fondo: votu veder che i ghe ga frega’ ’a patente ànca a lu’.
- Nooo! Lu’ ’se un tipo ecologico. Secondo mi el ga fato ben a far ’l libreto, ànca parchè da st’ano ’a patente canbia, i te da vinti punti e ogni multa i te ne porta via un pochi, da uno a diese. Finio i punti, adio patente.
- No me piase! Intanto parchè vinti punti e no vintiun come a scopa? Che se par disgrassia te perdi do volte diese punti te resta ancora ’a patente, magari par un punto sol, ma almanco te salvi ’l cappotto.
- Ma varda che i punti persi te pol ànca ciaparli da novo. Par esempio se te frequenti un corso de autoscuola i te da indrio sie punti.
- E quei dea autoscuoea quanti s-chèi ciapei? Bepi, credeme a mi, la è tuta ’na magnarìa. – Nina! Porta ancora do onbre che tanto stasera se va casa a piè!
- Va ben. Stasera no gavemo ’a machina, però dovemo meterse in testa che su ’a strada gira tanta ’sente che ga el sacrosanto dirito de no esser messi soto da un inbriago.
- A mi no l’è el vin che me imbriaga ma ’e rotatorie!
- Qua te dàe rason! Ànca mi co’ rive su una de nova me toca vardar in giro par veder quel che i fa chealtri. No so mai se go ’a precedensa o se go da fermarme.
- Come fatu a distinguer fra ’na rotatoria tradisionàe, una europea e quea ibrida, che sol che nominarla me fa vegner in ment el suturco transgenico!
- Sperem che ’l Signor, a chi che le ga inventàe, el ghe dae ànca a grassia de capir cossa che i ha cunbinà e, dato ch l’è drio, che ’l ghe mande l’ispirassion par risolver el problema.
- AMEN!! Adesso podemo ànca ’ndar casa che l’é tardi.
- Note Toni! Me racomando, tiente sul bever.
- Sta’ tranquio, in caneva go ’na colonna bea sòida! Ciao Bepi!
Glossario:
- (1)uncuò: oggi.