A machina zaea
Fameja Alpina > Toni e Bepi
Toni e Bepi
di Isidoro Perin
'A machina zaea
- Ciao Toni. Bevetu un’onbra.
- Vuintiera, ànca parchè l’è un sec che me grata in goea.
- Ciò, co’ ’ste polveri sotìi non se sa pi’ come cavarsea.
- Bisognarìa inquinar manco.
- Ti, ma varda che col presso del Petrolio, mi de bensina ghe ne consume poca, el resto le è tute tasse.
- Se vede che ànca ’e tasse inquina!
- A proposito de petrolio: col costéa sentosinquanta dòeari al baril ’i diséa che ’a crisi ièra colpa del petrolio massa caro, adess che ’l costa vintisinque dòeari ’i dise che ’a crisi la è colpa del petrolio che costa massa poc.
- Mi me sa che ’i sa contarla e intanto i me frega senpre.
- Però ’l governo ’l dise che ’e nostre banche le è bèe sòide.
- Se l’è par quel ’e sa far ben el so’ mistièr coi nostri s-chei!
- E se i s-chei sparise… paga i pori can.
- Àtu mai vist che par ’na banca che faìse vae in preson el diretor?
- No!
- Se vede che va ben cussì!
- ’E banche le è fate par ciavarghe i s-chei ai poreti e darghei ai siori.
- Cussì come che ’a guera la è fata dai siori par copàr i poreti.
- Adess la è canbiada ànca ’a guera. No ghe n’è pi’ un fronte che te posse vederlo. Adess ’i riva, ’i spara e po’ i sparisse.
- Co’ ’sto ISIS no se ghe vede ciaro. Chissà dove che ’i vol rivàr.
- I nostri poitici dise che se pol star tranquìi, che ’i à mess in moto tuti i piani de sicuressa.
- Sì! Sì! L’è par quel che in tre baénghi co’ ’na macchia ’sàea ’i à cumbinà ’l finimondo par ’na setimana sensa che nessuni sia stati boni de ciaparli.
- Tanto, ànca se nostri carbinieri ’i riesse a ciaparli el dì drìo ’i torna fora.
- E noaltri se se prova a difenderse se va finir in gaèra e buta via ’a ciàve.
- Àea saeute Toni, e sta atento ae machine zae!
- Ciao Bepi, e sta atento ànca ti, parchè ’i roba de dì e fa i mati de not!