"S.S. e S.S." Sani, salvi e senza soldi!
Fameja Alpina > Toni e Bepi
Toni e Bepi
di Isidoro Perin
"S. S. e S. S.” sani, salvi e sensa soldi!
- Ciao Bepi! Bevetu un’onbra?
- Vuintiera! Pecà che no ghe n’è pi’ el vin novo, amabìe, un fià tòrbol, adess ghe n’è ’l novelo.
- Però l’è bon, ànca se no te sa gnanca come ciamàrlo in diaéto.
- Par fortuna che no l’è quel el problema.
- Toni, te me par massa serio. Cossa atu?
- Te rendetu conto che i me ha magnà i s-chéi n’altra volta.
- Un fià l’ è colpa nostra: no me ha bastà ’a Montedison, ’a Parmalat, ’a Cirio, i bond dell’Argentina… adess i me ha rifià ànca i debiti dèe case de cartòn dei ’Mericani.
- Eh!!! Ma da uncuò ’e robe canbia!
- Par forsa! S-chèì no ghe n’è altri.
- No! No! Intendée dir che l’è canbià el Presidente dei Stati Uniti, e l’è ’ndat su un Presidente nero, quasi.
- Però, bisogna dirlo, come che ’e canbia ’e robe! in America sinquant’ani fa quei che voèa darghe qualche dirito ai neri, i vegnéa copài, ànca se i ièra bianchi! Adess el Presidente l’è un african!
- Tuti se speta che ’l fae miràcui, parché ’l conosse i problemi dei poréti.
- Meti, ànca che li conosse, cosa vutu che ’l fàe!? Lu l’è ’l Presidente dei Stati Uniti e i nostri s-chéi i è persi. No te vedi che par risolver i problemi i vol darghe pi’ s-chei ai operai sùa tredicesima, per poderghéi fregar suìto, prima de Nadal.
- Me par de sentir Mussuini co’ l’ha inventà i assegni familiari par vér pi’ omeni da far copàr in guerra.
- A proposito de guerra: àtu vist che rassa de feste pa’ ’l novantesimo déa vitoria?
- Ho vist a Nervesa ’a rievocassion storica del’ultima battaglia e ò sentì i sgrisoeòn drìo ’a s-chena. Ho vist ànca el nostro Presidente a Vitorio Veneto, che ghe ha vegnù el magòn co’ l’ha nominà so pare che l’è vegnù a far ’guera qua, sull’Altopiano de Asiago.
- Ghe ièra tanti zoveni a vardàr e applaudìr, zoveni che vol saver, che vol conosser, che i à ancora paura déa guerra.
- I à rasòn. ’A guera, ’sta maledeta, la à senpre vinta éa. La à ’e man longhe. Dopo novanta ani ghe n’è ancora na pàca de bonbe sul Grappa e sua Piave.
- E ghe n’è tanti fioi che no l’è conosse, che ’i sbaglia e che, qualche volta, i ghe rimete ’a pée.
- Aea saeute Toni.