'A resa dei conti
Fameja Alpina > Toni e Bepi
Toni e Bepi
di Isidoro Perin
‘A resa dei conti
- Ciao Toni. Bevetu un’onbra?
- Ma si! Dame un “novello” prima che’l devente vecio.
- Atu vist che rassa de panevin che i ha fat ’st’ano?
- Son restà impressionà dal fum che ghe ièra in giro dapartut; e pensar che i dise che ’e faive ’ndea verso sera!
- El fun invece el va dai bei e i bruti (1)li sofeghéa.
- No te à sentì che i vol tirar via ’a tradissione dei panevin parchè l’ inquina.
- Vutu dir che fa pi’ dani un fogo de legne seche ’na volta l’ano che un milion de machine che corre dì e not?
- Ànca quee che gà el “bollino blu” come ’e banane?
- Parchè secondo ti quee vae ’a aqua?
- Basta però che no i fae fogo ànca co’ l’oio brusà o co’ ’e legne tratae chimicamente.
- ’Na volta, parchè no ’e fesse i carioi, se taiea ’e cassie in caent de luna, adess invesse i ghe dà ’na bota de vernise che noaltri e i carioi se more ànca a vardarle da distante.
- No se more sol che par quel. Ànca ’e bestie se à voltà contro de noaltri.
- Prima ’se rivà “La mucca pazza”, che dita cussì ’a par el titoeo de na farsa da teatro.
- Veramente se ’e vache vedesse che i gà incoeorìo ànca el latte dentro sui cartoni, no so che tiri che ’e farìa.
- Adess invese i se gà inventà “L’influenza aviaria” che, par chi che no eo sa, se podarìa confonderla co’ uno dei tanti programi de opinion che fa ’a teevision dàa matina aea sera.
- Invese la ’se ’na maeatia tremenda che te fa fora el puner ostrega!
- Ànca ’na volta se maéa i pituss; i ciapea “el pip”, te ’i vedea restar ingrumai, co’ i oci serài, e ogni tant i slonghéa el col e i fea ’na spessie de pipada.
- Me nona ghe verzéa el bec e ’a ghe metea dentro un fià de ’séo, ma de sòito, dopo un per de dì, i morìa istesso.
- Me ricorde che ’na volta però, ogni fameja ’vea ’na diesena de gaine e qualche anara.
- Te gà rason! No ghe ièra ’a cosidetta “produssione intensiva”(che non son bon gnanca dirla puìto), adess ’i mete quatro poeastri par metro quadrato!.… Bepi! Cossa situ drìo pensar?…
- Toni!… Te pénsetu che rassa de maeatie che vegnarà fora fra qualche ano, co’ i apartamenti un sora quealtro che ’e me par tute cunicère?
- Vegnarà fora ’a rabia… par no esser stati boni de rispetar ’a natura che me dà da viver… quasi gratis!
Glossario:
(1)li sofeghéa: li soffoca.